May 24, 2024

Madhesh Khabar

मधेशको न.१ मेडिया हजुरको हरपलको साथमा – मधेश खबर

भक्तपुर क्यान्सर अस्पतालमा कार्यकारी निर्देशक परिवर्तनपत्र कार्यान्वयन नगर्न अन्तरिम आदेश

बुधबार न्यायाधीश सपना प्रधान मल्लको इजलासले पत्र कार्यान्वयन नगर्न मन्त्रालयको नाममा अन्तरिम आदेश जारी गरेको हो ।

मन्त्रिपरिषद्‌स्तरीय बैठक गर्दै स्वास्थ्यमन्त्री मोहनबहादुर बस्नेतले भक्तपुर क्यान्सर अस्पतालको कार्यकारी निर्देशकमा नियुक्त भएका डा. विष्णुदत्त पौडेललाई हटाएर नवौँ तहका डा. उज्वल चालिसेलाई निमित्त कार्यकारी निर्देशक बनाउने निर्णय गरेका थिए ।

अवधि बाँकी हुँदाहुँदै कानुनविपरीत आफूलाई हटाइएको, हटाउनुको कारण नदिइएको र मन्त्रिपरिषद्को निर्णयलाई स्वास्थ्यमन्त्रीको निर्णयबाट हटाइएको भन्दै कार्यकारी निर्देशक डा. पौडेल गत असार २२ गते सर्वोच्च अदालत पुगेका थिए ।

सोही निर्णयविरुद्ध डा. पौडेलको मागबमोजिम सर्वोच्व अदालतले अन्तरिम आदेश जारी गरेको छ ।

डा. पौडेल २०७७ साल मङ्सिर १८ गतेको मन्त्रिपरिषद्को निर्णयबाट भक्तपुर क्यान्सर अस्पतालको कार्यकारी निर्देशकमा नियुक्त भएका थिए । उनी ४ वर्षका लागि नियुक्त भएका थिए । तर, कार्यकारी निर्देशक भएको २ वर्ष ७ महिनामै गत मंगलबार डा. पौडेललाई हटाएर डा. चालिसेलाई निमित्त कार्यकारी निर्देशकको जिम्मेवारी दिइएको थियो ।

निमित्त कार्यकारी निर्देशकको जिम्मा दिइएका चालिसेले असार १९ गते नियुक्तिपत्र बुझाई कामकाज सुरु गरिसकेका छन् ।