सल्यानको कुमाख गाउँपालिकाले ल्याउन सकेन बजेट, गाउँसभा पनि अनिश्चित

सुर्खेत, असार २७, २०८०

१० असार १० भित्रमा बजेट ल्याउनुपर्ने भए पनि सल्यानको कुमाख गाउँपालिकाले अहिलेसम्म पनि बजेट ल्याउन सकेको छैन । पालिकाले २५ असारमा कार्यपालिकाको बैठक आह्वान गरे पनि बैठकले गाउँसभाको मितिसमेत तोक्न नसकेको हो ।

कार्यपालिकाका सदस्यहरूले पालिका नेतृत्व गतिविधिमा प्रश्न गर्दै बैठकमा असहमति जनाएपछि कुमाख गाउँपालिकाको गाउँसभा सञ्चालनको समेत कुनै टुंगो लागेको छैन । कार्यपालिका बैठकबाट बजेटसमेत पारित भएको पनि छैन ।

कुमाख गाउँपालिका–१ का वडाध्यक्ष डिल्लीबहादुर रानाले भने, ‘पालिका नेतृत्व गर्नेहरूले मनोमानी रूपमा काम गर्नुभएको छ । कार्यपालिका बैठकलाई नै नटेर्ने गरेपछि हामीले असहमति जनाएका थियौँ ।’ २०७९-८० मा प्राविधिक शिक्षा छात्रवृत्ति, अध्यक्ष कप खेलकुद, माध्यमिक विद्यालयमा दरबन्दी सिर्जनालगायतका विषयमा पालिकाका अध्यक्ष मानबहादुर बुढाथोकीले एकाधिकारसहितको गतिविधि सञ्चालन गरेको उनको आरोप छ ।

यसअघिको कार्यपालिका बैठकमा समेत वडाध्यक्ष रानालगायतका कार्यपालिका सदस्यहरूले असहमति जनाएपछि गाउँसभाको मितिसमेत तोक्न सकिएको छैन । ‘हामीले समीक्षा गरौँ भनेका थियौँ । यो वर्षमा भएका कार्यक्रमको समीक्षा गर्नुपर्छ’, वडाध्यक्ष रानाले भने, ‘हाम्रा काम राम्रा पनि भएका होलान् । बिग्रिएका पनि होलान् । सकारात्मक वा नकारात्मक दुवै जे भए पनि समीक्षा हुनुपर्छ भन्ने हाम्रो माग हो ।’

पालिका अध्यक्षलगायतले कार्यसम्पादन समीक्षा गर्न नमानेपछि आफूहरूले असहमति जनाएको उनले बताए । स्थानीय सरकार सञ्चालन ऐन, २०७४ बमोजिम कार्यपालिकाबाट सभामा बजेट पेस गर्नुपर्ने हुन्छ । पालिकाको राजस्व र व्ययको अनुमानित बजेट कार्यपालिकाबाट स्वीकृत गराई सभामा पेस भएपछि त्यहाँ छलफल गर्ने कानुनी व्यवस्था छ ।