May 25, 2024

Madhesh Khabar

मधेशको न.१ मेडिया हजुरको हरपलको साथमा – मधेश खबर

नेदरल्याण्ड्सलाई जित्नैपर्ने खेलमा नेपालको ब्याटिङ वेष्ट इन्डिजसँग भन्दा कमजोर

 

काठमाडौँ ।

जिम्बाब्वेमा जारी आईसीसी विश्वकप छनोट क्रिकेट प्रतियोगिताको चौथो तथा समूह चरणको अन्तिम खेलमा नेपालले कमजोर प्रदर्शन गरेको छ ।

नेदरल्याण्ड्सविरुद्धको खेलमा नेपालले कमजोर ब्याटिङ प्रदर्शन गरेको हो । दुई पटकको विश्वकप विजेता वेष्ट इन्डिजसँग भन्दा नेपालले कमजोर स्कोर खडा गरेको हो ।

टस हारेर पहिले ब्याटिङ गरेको नेपालले ४४.३ ओभरमा अलआउट हुँदै १६७ रनमात्र बनाउन सक्यो । नेपालका लागि कप्तान रोहित शर्माले सर्वाधिक ३३ रन बनाए । त्यस्तै सन्दीप लामिछाने र कुशल भुर्तेलले समान २७ तथा भीम शार्कीले २२ रन बनाए ।

जिम्बाब्वेका लागि लोगन भान बिकले ४ विकेट लिए ।

यसअघि नेपालले वेष्ट इन्डिजविरुद्ध २३८ रन बनाएको थियो भने आयोजक जिम्बाब्वेविरुद्ध २९० रन बनाएको थियो ।

तर ती दुई टोलीभन्दा कमजोर नेदरल्याण्ड्ससँग भने फितलो ब्याटिङ गरेको हो ।

सुपर सिक्समा पुग्नका लागि नेपालले यो खेल फराकिलो अन्तरले जित्नैपर्ने दबाब रहेको छ । यो समूहबाट जिम्बाब्वे र वेष्ट इन्डिज सुपर सिक्समा पुगिसकेका छन् ।

अब नेपाल र नेदरल्याण्ड्समध्ये एक टिम सुपर सिक्समा पुग्नेछ । समूहका पाँच टिमध्ये दुई टिम बाहिरिने छन् । अमेरिका अहिलेसम्म अंकविहीन हुँदै समूह चरणबाटै बाहिरिएको छ ।

सुपर सिक्समा पुग्न नेपालले नेदरल्याण्ड्सलाई हराएरमात्र पुग्ने छैन आगामी सोमबार हुने खेलमा वेष्ट इन्डिजले नेदरल्याण्ड्सलाई हराउन पर्ने हुन्छ ।

आजको खेलमा नेपाल पराजित भएमा समूह चरणबाटै बाहिरिने पक्का हुनेछ ।

अहिलेसम्म खेलेका तीन खेलमा नेपालले एक खेल जित्दा दुई खेलमा हार बेहोरेको छ । नेपालले अमेरिकालाई ६ विकेटले हराउँदा जिम्बाब्वेसँग ८ विकेट तथा वेष्ट इन्डिजसँग १ सय १ रनको फराकिलो अन्तरको हार बेहोरेको थियो ।

त्यस्तै नेदरल्याण्ड्स जिम्बावेसँग ६ विकेटले पराजित भएको थियो । नेदरल्याण्ड्सले अमेरिकालाई ५ विकेटले पराजित गरेको थियो । नेपाललाई हराउँदा नेदरल्याण्ड्स औपचारिक रुपमा सुपर सिक्समा पुग्नेछ ।

हेड टु हेड
दक्षिण अफ्रिकामा भएको अभ्यास खेलमा नेपाल नेदरल्याण्ड्ससँग पराजित भएको थियो । पछिल्लो समय नेदरल्याण्ड्सले टेष्ट टोली सहभागी सुपर लिग खेलेको थियो ।

हालसम्म नेपाल र नेदरल्याण्ड्स बीचमा दुई एक दिवसीय खेल भएको छ । जसमा नेपाल र नेदरल्याण्ड्सले एक एक खेल जितेका छन् ।

समूह चरणको अवस्था
समूह एमा रहेको नेपालको टिममा आयोजक जिम्बाब्वे, वेष्ट इन्डिज र अमेरिकासँगै नेदरल्याण्ड्स रहेका छन् ।

२ खेलबाट ४ अंकसहित वेष्ट इन्डिज शीर्ष स्थानमा छ । २ खेलबाट ४ अंकसहित जिम्बाब्वे दोस्रो स्थानमा छ ।

अहिले वेष्ट इन्डिज र जिम्बाब्वे भिडिरहेका छन् । जित्ने टोली समूह चरणको विजेता हुँदै सुपर सिक्समा पुग्नेछ ।

२ खेलबाट २ अंकसहित नेदरल्याण्ड्स तेस्रो स्थानमा छ । ३ खेलबाट २ अंकको नेपाल चौथो स्थानमा छ । ३ खेलबाट अंकविहीन अमेरिका पुछारमा छ ।

अर्को समूह
समूह बी मा २ खेलबाट ४ अंकसहित श्रीलंका शीर्ष स्थानमा छ । स्कटल्याण्ड २ खेलबाट ४ अंकसहित दोस्रो तथा ओमान ३ खेलबाट ४ अंकसहित तेस्रो स्थानमा रहेको छ ।

२ खेलबाट अंकविहीन आयरल्याण्ड र ३ खेलबाट अंकविहीन यूएई पुछारमा रहेका छन् । यूएई औपचारिक रुपमै सुपर सिक्स प्रवेशको सम्भावनाबाट बाहिरिएको छ भने आयरल्याण्डको अंक गणितीय सम्भावना कायमै छ ।

यस्तो छ विश्वकप छनोटको प्रतियोगिता
जिम्बाब्वेमा जारी विश्वकप छनोटमा सहभागी १० टोलीमा दुई टोलीले भारतमा हुने विश्वकप खेल्न पाउनेछन् । टोलीलाई दुई समूहमा विभाजन गरिएको छ । समूह ए मा नेपाल, जिम्बाब्वे, अमेरिका वेष्ट इन्डिज र नेदरल्यान्ड्स रहेका छन् । समूह बी मा श्रीलंका, आयरल्यान्ड, ओमान, यूएई र स्कटल्याण्ड छन् ।

हरेक समूहबाट शीर्ष तीन टोलीले सुपर सिक्समा स्थान बनाउने छन् । जसबाट सुपर सिक्समा अर्को समूहबाट आउने तीन टोलीसँग खेल्नुपर्ने हुन्छ ।

सुपर सिक्समा शीर्ष दुई टोलीले विश्वकपमा स्थान बनाउने छन् । पूर्व विश्व च्याम्पियन वेस्टइन्डिज र श्रीलंकालाई प्रमुख दाबेदार मानिएको छ । जिम्बाब्वे पनि घरेलु मैदानको फाइदा उठाउँदै विश्वकप खेल्न चाहन्छ ।

नेपाल, स्कटल्यान्ड र ओमान आईसीसी विश्वकप लिग टु मा शीर्ष तीनमा रहँदै विश्वकप छनोट खेलिरहेका हुन् । अमेरिका र यूएई लिग टुबाट घटुवा हुँदै विश्वकप छनोट प्लेअफमा शीर्ष दुईमा रहँदै विश्वकप छनोटमा आएका हुन् ।

श्रीलंका, आयरल्यान्ड, नेदरल्यान्ड्स, वेस्ट इन्डिज र जिम्बाब्वे आईसीसी विश्वकप सुपर लिगमा पुछारमा रहँदै छनोट खेलिरहेका हुन् ।