May 24, 2024

Madhesh Khabar

मधेशको न.१ मेडिया हजुरको हरपलको साथमा – मधेश खबर

सिद्धार्थनगरको बजेट १ अर्ब १३ करोड

 

भैरहवा —

सिद्धार्थनगर नगरपालिकाले आगामी आव २०८०/८१ का लागि १ अर्ब १३ करोड ४१ लाख रुपैयाँको बजेट सार्वजनिक गरेको छ ।नगरपालिकाको १३ औं अधिवेशनमा उपप्रमुख उमा अधिकारीले पूर्वाधार विकास र आर्थिक सामाजिक विकासलाई प्राथमिकतामा राख्दै आइतबार बजेट पेस गरेकी हुन् ।

अधिकारीले चालु आर्थिक वर्षभन्दा २१ करोड बढी बजेट घटाएर पेस गरेकी छन् । चालु आर्थिक वर्षमा १ अर्ब ३४ करोड आम्दानी हुने लक्ष्य राखिए पनि ९४ करोडमात्र आम्दानी भएको कारण बजेटको आकार घटाउनु परेको छ ।

संघीय सरकारबाट समानीकरण अनुदानमा १७ करोड ८९ लाख, ससर्त अनुदानमा २८ करोड ५४ लाख, समपुरक अन्दान ८० लाख रुपैयाँ, विशेष अनुदान ९० लाख रुपैयाँ र राजस्व बाँडफाँडमा १० करोड ४३ लाख ४६ हजार आम्दानी हुने नगरपालिकाको प्रक्षेपण छ ।

प्रदेश सरकारबाट वित्तीय समानीकरण अनुदान १ करोड ३७ लाख ३३ हजार, ससर्त अनुदान ८६ लाख ५० हजार रुपैयाँ, राजस्व बाँडफाँडबाट ८६ लाख ८० हजार ४ सय १३ रुपैयाँ, समपुरक अनुदान १ करोड ५० लाख रुपैयाँ प्राप्त हुने उपप्रमुख अधिकारीले बताइन् ।

नेपाल सरकार र एसियाली विकास बैंकको संयुक्त लगानीमा संचालन हुने परियोजनाको लागि दातृ निकायबाट प्राप्त हुने १३ करोड ४० लाख, मालपोत कार्यालयबाट प्राप्त हुने राजस्व बाँडफाँडको रकम ५ करोड रुपैयाँ, आन्तरिक आयबाट १९ करोड ९५ लाख र अनुमानित बैंक मौज्दात ११ करोड ८९ लाख ३२ हजार ५ सय ८७ रुपैयाँ गरी १ अर्ब १३ करोड ४१ लाख ४२ हजार हुने अनुमान गरेको उनले बताइन् ।

यसअघि नगरपालिकाका प्रमुख इस्तियाक अहमद खानले नीति तथा कार्यक्रम प्रस्तुत गर्दै ‘कृषि, पर्यटन, उद्योग, व्यापार र शिक्षा र हराभरा बुद्धभूमि सिद्धार्थनगरको ईच्छा’ भन्ने नगरपालिकाको दीर्घकालीन सोच रहेको बताए ।

नगरपालिकामा सुशासन कायम गर्दै सर्वाङ्गिण क्षेत्रको संस्थागत विकासमा जोड दिइने, कृषिको आधुनिकीकरण, सहकारी क्षेत्रको सुशासन, पर्यटन र उद्योग–व्यापार क्षेत्रको विस्तार र विविधीकरणमा जोड दिइने नीति तथा कार्यक्रममा उल्लेख छ । शिक्षा र स्वास्थ्यमा नागरिकको पहुँच र गुणस्तर अभिवृद्धि गर्दै समावेशी विकासमा जोड एवम् दिगो विकास, वातावरणमैत्री कार्यक्रम तथा वातावरण संरक्षणमा जोड दिइने नगर प्रमुख खानले बताए ।