काठमाडौंको फोहोर व्यवस्थापन गर्न महानगरको के छ योजना ?

काठमाडौं

महानगरले फोहोरमैला व्यवस्थापन गर्न आगामी आर्थिक वर्ष २०८०/०८१ का लागि ८७ करोड ९३ लाख रकम विनियोजन गरेको छ । कूल बजेट २५ अर्ब ५४ करोड ७८ लाखमध्ये फोहोरमैला व्यवस्थापनका लागि ८७ करोड ९३ लाख रकम महानगरले छुट्टाएको हो ।

महागरको मुख्य चुनौती भनेकै फोहोर व्यवस्थापन हो । धादिङ र नुवाकोटको सिमानामा पर्ने बञ्चरेडाँडामा काठमडौंको फोहोर विसर्जन गरिँदै आएको छ । तर स्थानीयको अवरोधका कारण फोहोर व्यवस्थापनमा चुनौती हुने गरेको छ । फोहोर व्यवस्थापन गर्न महानगरले उपयुक्त विधि र प्रणालीसहितको कार्यक्रम सञ्चालन गर्ने योजना ल्याएको छ । आज सार्वजनिक गरिएको बजेटमा उपप्रमख सुनिता डंगोलले भनिन्, ‘आगामी आर्थिक वर्षभित्रमा फोहरमैला व्यवस्थापनको उपयुक्त विधि र प्रणालीसहितको कार्यक्रम संचालन गर्न आवश्यक रकम विनियोजन गरेको छु ।’

सरसफाई कार्यमा प्रयोग हुने सवारी साधन एवं यन्त्र उपकरणको उपलब्धतामा कमी नहुने व्यवस्था गर्न त्यस्ता सवारी साधन र उपकरण खरिद गर्नका लागि २७ करोड रकम विनियोजन गरिएको उनले बताइन् ।

महानगर क्षेत्रभित्रका नदीहरूको नियमित सरसफाई गरी नदी किनार क्षेत्रसमेतको संरक्षण कार्यक्रमलाई महानगर स्वर्णिम योजनाको रुपमा संचालन गर्न ७ करोड रकम विनियोजन गरिएको महानगरले जनाएको छ । वायु प्रदूषण, ध्वनी प्रदूषणलगायतका पर्यावरणीय क्षेत्रसँग सम्बन्धित विषयमा विभिन्न अध्ययन एवं अनुसन्धानका लागि पनि बजेट विनियोजन गरिएको छ ।