June 13, 2024

Madhesh Khabar

मधेशको न.१ मेडिया हजुरको हरपलको साथमा – मधेश खबर

आन्दोलनको राप र ताप विस्फोट गर्न देशभरका राहत शिक्षकहरु तयार

 

असार २०, २०८०

नेपाल राहत शिक्षक केन्द्रीय समितिले काठमाडौँ केन्द्रित आन्दोलन चर्काउने भएको छ । माग सम्बोधनका लागि तीनदिने अल्टिमेटम दिँदै समितिले अन्यथा काठमाडौंमा राप र ताप विस्फोट हुनेगरी आन्दोलन गर्ने चेतावनी दिएको हो ।

समितिले आज सातै प्रदेशका अध्यक्ष, ७७ जिल्ला अध्यक्ष र ७५३ वटै पालिका अध्यक्षलाई सर्कुलर गर्दै आन्दोलनका निम्ति तयारी अवस्थामा रहन निर्देशन दिएको छ । ‘४० हजार राहत शिक्षकको आन्दोलनको राप र ताप विस्फोट गर्न देशभरका सबै समितिहरु प्रदेश, जिल्ला र पालिकास्तरमा तत्काल बैठक बसि सबै हिसाबले तयार रहन र केन्द्रीय समितिले संकेत गर्नासाथ काठमाडौं ओर्लिन देशभरका सबै राहत शिक्षकहरुमा आह्वान गरिन्छ’, सर्कुलरमा उल्लेख छ ।

सरकारले मन्त्रिपरिषद्मा लैजान लागेको शिक्षासम्बन्धी मस्यौदा शिक्षकहरुले यसअघि पटकपटक गरेको आन्दोलनको मर्मविपरीत भएको समितिले जनाएको छ । शिक्षा मन्त्रालयले एकलौटी ढंगले पञ्चायती शैलीमा मस्यौदा ल्याएको आरोप लगाउँदै समितिले उक्त मस्यौदाप्रति गम्भीर आपत्ति र असहमति व्यक्त गरेको छ ।

उक्त मस्यौदाले हजारौंको संख्यामा रहेको राहत शिक्षक पेशाबाट विस्थापित हुनुपर्ने अवस्था आउने उल्लेख गर्दै समितिले भनेको छ,‘शिक्षा मन्त्रालय र हाम्रो अभिभावकीय संस्था नेपाल शिक्षक महासंघलाई तीन दिनभित्र ठोस निकास दिन अल्टिमेटम दिइएको छ । अन्यथा, हामी सशक्त रुपमा मैदानमा उत्रिन बाध्य हुनेसमेत जानकारी गराउन चाहन्छौं ।’