जनकपुरधाम, मंसिर २९ । स्वास्थ्य क्षेत्रको लागि अत्यावश्यक दुई परियोजनाको शिलान्यास आज जनकपुरधाममा सम्पन्न भएको छ ।
प्रदेश सरकारको समन्वय तथा संघीय सरकारको सहयोगमा प्रदेश जनस्वास्थ्य प्रयोगशालाको भवन एवं प्रदेश मेडिकल स्टोर भवनको शिलान्यास सम्पन्न भएको छ भने कोभिड १९ विरुद्धको खोप भण्डारण गृहको समुदघाटन गरिएको छ ।
जनकपुर उपमहानगरपालिका १४ मुजेलिया स्थित ग्रामीण प्रशिक्षण केन्द्र हाता भित्र निर्माण हुन लागेको उक्त भवनहरुको संघीय शहरी विकास मन्त्री रामकुमारी झाँक्री, मुख्यमन्त्री लालबाबु राउत र समाजिक विकास मन्त्री नवल किशोर साहले संयुक्त रुपमा शिलान्यास गर्नु भएको हो । त्यसै गरि उहाँहरुले सोही परिसरमा निर्मित खोप भण्डारण गृहको उद्घाटन समेत गर्नु भयो ।
७ करोड २७ लाख लागतमा निर्माण हुने प्रदेश जनस्वास्थ्य प्रयोगशालाको साढेतीन तल्ले भवन २०८० साल बैशाख ९ गते भित्र सम्पन्न गर्ने लक्ष्य लिइएको छ भने चार करोड ४२ लाखमा निर्माण हुने प्रदेश मेडिकल स्टोर समेत डेढ वर्ष भित्र निर्माण सम्पन्न गर्ने लक्ष्य लिइएको छ।
उद्घाटन तथा शिलान्यास कार्यक्रममा मुख्यमन्त्री राउतले शिलान्यास गरिएका भवनहरु तीनै तह बीचको समन्वय र सहकार्यको अनुपम उदाहरण भएको बताउनु भयो ।
उहाँले स्रोत साधनको आभावमा समेत कोभिड १९ विरुद्ध प्रादेशिक जनस्वास्थ्य प्रयोगशालाले खेलेको भूमिकाको प्रशंसा गर्नु हुँदै नयाँ भवन निर्माण पछि प्रयोगशाला थप सशक्त हुने विश्वास व्यक्त गर्नु भयो ।
सहरी विकास मन्त्रालयका सचिव मणिराम गेलालको अध्यक्षतामा भएको उक्त कार्यक्रममा प्रमुख अतिथि संघीय सहरी विकास मन्त्री रामकुमारी झाँक्री, समाजिक विकास मन्त्री नवलकिशोर साह, उद्योग , पर्यटन वन तथा वातावरण मन्त्री सत्रुधन महतो सहितका वक्ताहरुले सम्बोधन गर्नु भएको थियो ।
More Stories
श्री मा.बी.कर्कच गूठीमा निर्वाचनको प्रक्रियाबाट बिधालय व्यवस्थापन समिति चयन हुने
शिवनगर अस्पतालला एक महिनामा २ सुत्केरी महिलाको मृत्यु, अवस्था तनावग्रस्त ।
आजपा केन्द्रीय सदस्य साहलाई रिहा नगरिए कडा आन्दोलन गर्ने घोषणा